Sette candele

Sette Candele

Sette candele
De la Menorà
Sbianca el viseto
De Rachele Fuà
Sacro Shadai
Sia benedeto
El tuo nome
La se disi
Con vose d'useleto
Nel bianco fresco
De la sinagoga
E no la sa
Che un caporal tedesco
Fra sette giorni
Cussi la coperà
Brusandola in Risiera
E Adonai?
Morto anche lui
Fra nuvoli de gas
Spaccapolmoni
Fumo grasso
Pesante
A bissa disegnado
Spuda el camin
E sbater d'inferiade
London colin
La radio ne conforta
Parole su parole
Mi vivo ma lei morta

Arone Pakitz

Ad Alice Pincherle

Ebreo coi rizi
Del gheto de Cracovia
Un misirizi
Import - Export
Morto a Varsavia
Suo fio Simon
Chirurgo a Vienna
Fato baron
Per ordine del Kaiser
Morto a Gorizia
Paola sua fia
Cantante d'operetta
Fata savon
Per ordine del Führer
Morta a Mathausen